PORI KWA PORI BLOG

Monday, 3 December 2012

TAMASHA MAAZIMISHO SIKU YA UKIMWI DUNIANI KWA VYUO VIKUU ARUSHA

wanafunzi wa vyuo vikuu mkoani arusha wakiwa katika tamasha la siku ya ukimwi duniani lililofanyika katika ukumbi wa chuo kikuu cha makumira leo, tamasha hilo limeandaliwa na kituo cha radio 5 kwakushirikiana na jumuiya ya afrika mashariki nia ikiwa kuwahamasisha vijana wasipoteze malengo yao.

KOMBE LA CHALENJI- TANZANIA YAENDELEA KUOSHA, KILI STARS KUCHEZA NUSU FAINALI ALHAMISI

Release No. 189

TAARIFA KWA VYOMBO VYA HABARI

Desemba 3, 2012

KILIMANJARO STARS KUCHEZA NUSU FAINALI ALHAMISI

Tanzania Bara (Kilimanjaro Stars) itacheza nusu fainali ya michuano ya Kombe la Chalenji 2012 Alhamisi (Desemba 6 mwaka huu) kwenye Uwanja wa Mandela ulioko Namboole jijini Kampala, Uganda.

Kilimanjaro Stars ambayo itacheza mechi hiyo na mshindi wa robo fainali ya kesho (Desemba 4 mwaka huu) kati ya wenyeji Uganda na Ethiopia imeingia hatua hiyo baada ya kuitoa Rwanda. Mechi imechezwa leo (Desemba 3 mwaka huu) Uwanja wa KCC ulioko Lugogo, Kampala.

Mabao ya Amri Kiemba dakika ya 33 na John Bocco dakika ya 53 ndiyo yaliyoifanya Kilimanjaro Stars itinge nusu fainali na kuifungisha virago Rwanda (Amavubi) inayofundishwa na Milutin ‘Micho’ Sredojovic kutoka Serbia.

Vijana wa Kilimanjaro Stars wanaonolewa na Kim Poulsen walitawala pambano hilo, hasa kipindi cha kwanza kwa pasi fupi fupi. Kilimanjaro Stars imefungwa bao moja katika mechi nne ilizocheza tangu michuano hiyo ilipoanza Novemba 24 mwaka huu jijini Kampala.

Kilimanjaro Stars ambayo katika michuano hiyo iliyofanyika Dar es Salaam mwaka jana iliishia hatua ya nusu fainali iliwakilishwa na; Juma Kaseja, Erasto Nyoni, Amir Maftah, Shomari Kapombe, Kelvin Yondani, Amri Kiemba, Salum Abubakar/Athuman Idd, Frank Domayo, Mwinyi Kazimoto, John Bocco na Mrisho Ngasa.

MICHUANO YA KOMBE LA UHAI KUANZA DESEMBA 7

Michuano ya Kombe la Uhai inayoshirikisha timu za U20 za klabu za Ligi Kuu ya Vodacom inatarajia kuanza Desemba 7 mwaka huu na kumalizika Desemba 22 mwaka huu.

Wachezaji watakaoshiriki michuano hiyo ni wale tu ambao usajili wao umefanyika Shirikisho la Mpira wa Miguu Tanzania (TFF) na kupata leseni. Hakutakuwa na usajili mwingine wowote mbali na ule uliofanyika sambamba na wa Ligi Kuu.

Taratibu zote za michuano hiyo zitafahamishwa kwa klabu husika ikiwemo ratiba ya michuano hiyo.

Boniface Wambura

Ofisa Habari

Shirikisho la Mpira wa Miguu Tanzania (TFF)

Kampala, Uganda

+255 71 3210242

+255 76 7310242

FREDY MTOY HATUNAE TENA- IBADA YA KUMUIGA YAONYESHA UMAHIRI WAKE KATIKA KAZI

“Alikua mfano dhahiri wa neno mtanashati”-Zawadi Machibya, mratibu wa msiba na mtangazaji wa BBC Swahili

Na: Freddy Macha

Kanisa la St Annes Lutheran katikati ya jiji la London juzi Jumamosi lilikuwa kituo maalum cha kumwaga na kuwa wasifu wa maisha ya marehemu Freddy Alex Mtoi aliyekuwa mtangazaji wa BBC Swahili kwa miaka mingi.

Ibada hiyo iliyoendeshwa na wachungaji Tumaini Kalaghe na Mathew Jutta, ilihudhuriwa na wanahabari mbalimbali kutoka BBC , Ofisa wa Ubalozi wa Tanzania, Clement Kiondo, marafiki wa karibu waliomjua marehemu na wanananchi wa sehemu toka Tanzania, Afrika na Ulaya.

Mratibu wa mazishi , Zawadi Machibya, ambaye ni mtangazaji wa BBC, aliendesha shughuli na kuwajulisha wasemaji wote waliozungumzia kwa kuanza kueleza namna neno “mtanashati” lilivyomvaa Freddy Mtoi aliyefariki usiku wa kuamkia Jumamosi tarehe 17 Novemba, 2012.

Mchungaji Mathew Jutta alikumbusha kwamba safari yetu wanadamu huanzia kwa Mungu na kuishia kwa Mungu. Akailinganisha nsafari hiyo na ile ya kutoka nyumbani Afrika kuja Majuu (ambapo paliitwa Mtoni enzi mchungaji alipokuja Ulaya takribani miaka 20 iliyopita). “Kwa wanaobakia ni huzuni lakini kwa anayesafiri ni furaha yenye matumaini.” Akimzungumzia marehemu alitaka zaidi kututuliza roho tuliyobakia.

Maneno haya yalisimama dede kama dhamira kuu ya msiba. Kwamba badala ya kuhuzunika tujiratayarishe tunakokwenda kwa kuzingatia maneno ya Biblia, Yohana Mtakatifu 3:20 : “ Maana kila mtu atendaye mabaya huichukia nuru, wala haji kwenye nuru, matendo yake yasije yakakemewa.”

Wafanyakazi wenzake marehemu Mtoi nao waliendeleza hoja kwa kutueleza undani wa bidii yake marehemu kazini, tabia yake ya uungwana na upole. Akifafanua kwa kina, mtangazaji wa BBC toka Kenya Solomon Mugera alitoa mfano namna marehemu alipokuwa tayari kumenyeka hata wakati wenzake wakitaka kupumzika kama wakati wa sikukuu ya Krismasi. Mugera :“ Marehemu hakuwa mlalamishi au mbishi. Alikua haogopi kufanya kitu ambacho hakifahamu.”

Akitoa maelezo katika lugha ya Kiswahili na Kiingereza kwa niaba ya wageni wengine, Solomon alitaja mfano mwingine mkubwa wa jinsi Mtoi alivyokua mchapa kazi asiyenung’unika kiasi ambacho hata alipokuwa mgonjwa aliwaambia wenzake “ni kitu kidogo tu” wasitie shaka, kumbe mwenzetu alikua akielekea katika kifo.

Salim Kikeke mtangazaji gwiji aliyefanya kazi na marehemu toka Bongo miaka kumi iiliyopita alitukumbusha zaidi kwa undani vipindi Freddy Mtoi alivyovitoa kwa kuacha sauti yake isikike kwa wastani wa dakika moja.

Hapo tulimsikia akiwahoji wananchi mbalimbali mitaani Uingereza. Mfano kipindi alichowauliza watu maana ya mti wa Krismasi, unaothaminiwa sana na Wazungu. Kati ya wahojiwa alikuwa mchungaji Tumaini Kallaghe aliyeongoza sala hii juzi.

Tulipata vile vile fursa ya kusikiliza sauti za wazazi wake Mtoi wakieleza namna alivyokuwa mtoto mwenye bidii, mtiifu na aliyeanza kuipenda kazi ya uanahabari toka angali mdogo sana.

Mbali na wafanyakazi walikuwepo pia marafiki zake wa karibu , mathalan Prochest Tairo aliyefuta dhana iliyoenea ( toka msiba ulipotokea) kwamba marehemu alikuwa msiri na mtu wa kujificha.

Tairo ambaye pia ni bloga na alimjua Mtoi toka wakisoma wote sheria chuo kikuu cha Dar es Salaam mwaka 1997- 2002 alisema: “Kwa nje alikuwa akionekana mkimya sana, mkiongea anasikiliza anatabasamu. Lakini ukishamzoea ni mzungumzaji sana...si kweli alikuwa mkimya, ila ilibidi akuzoee.”

Aliongeza kueleza marehemu alipenda mazoezi ya viungo. Siku moja walikuwa mahali hadi ikafika usiku sana, lakini marehemu alitaka awahi Gym afanye angalau mazoezi nusu saa kabla ya kuelekea nyumbani. Wengi hatukujua alikuwa mpenda mazoezi.

Ibada iliendelea kwa nyimbo, sala na wahudhuriaji kutoa heshima zetu za mwisho mbele ya jeneza, kabla ya kusafirishwa Dar es Salaam, leo Jumatatu.

Idhaa ya BBC Swahili ambayo ilihusika sana na matayarisho haya ikisaidiana na Israel Saria, mwanahabari wa michezo anayeendesha tovuti ya Tanzania Sports, iliwakilishwa na watangazaji wengi maarufu wakiwemo pia Charles Hillary, Idi Sefu, Zuhura Yunus na Peter Musembi.

Akitoa neno lake Israel Saria alisema alijuana na Freddy Mtoi toka Tanzania. Saria ataisindikiza maiti inayotarajiwa kuwasili Dar es Salaam Uwanja wa Ndege wa Kimataifa wa Julius Nyerere, kwa ndege ya British Airways, Jumanne saa moja asubuhi.

Mipango ya Ibada na mazishi Tanzania itafanyika nyumbani kwa wazazi wake Tabata Maduka Manne jijini Dar es Salaam, saa Saba mchana Jumatano.

Mazishi yatafanyika makaburi ya Kinondoni , Jumatano hiyo hiyo saa tisa alasiri.

Habari zaidi tembelea:

http://kitoto.wordpress.com/

MWANAFUNZI ATIWA MIMBA NA ASKARI MAGEREZA

Ni mwanafunzi wa shule ya sekondari Serengeti, amejazwa mimba akiwa kidato cha pili na askari magereza. ameacha masomo lakini askari anaendelea na kazi.hapa anafanyiwa mahojiano na mwanahabari Shadrack Sagati.